【JARvel-knowledge ・日本人的上下座概念（餐廳篇）】
日本人對禮儀嘅認真程度，相信唔使我多講，今次想同大家分享一個關於就座嘅禮儀概念、「上座」(ka-mi-za)同「下座」(shi-mo-za)。用於一個場合當中，唔同身份嘅人應該分別坐喺咩位。
上座、顧名思義就係上司前輩、貴賓或者客人坐嘅好位，下座就係後輩嘅位置。最最最簡單黎講，喺一間房／餐廳之中，距離門口位最遠嘅就係上座，而最近門口位嘅就係下座。因為門口位多人出入入，而且又要負責同侍應溝通嘛。簡單概念大家都有喇，但又唔係每個地方嘅「上/下座」都係咁分嘅。以下就有啲特別少少嘅例子喇。
一、係舊式餐廳、溫泉旅館好常見嘅和室。
喺和室入面，通常你會發現有一個角落放咗花、或者字畫等嘅裝飾，呢個角落稱之為「床之間」。床之間係和室中最高地位同神聖嘅地方，所以背向床之間嘅座位，就係和室中嘅上座。而下座相對就簡單，就係頭先提過嘅最近出入口嘅位喇！如果和室冇床之間嘅話，咁都係同一條道理，距離出入口最遠嘅就係上座。除咗和室，洋室嘅基本概念都係一樣，不過唯一要注意嘅係，如果室內有暖爐，咁暖爐就會等同於床之間，所以背向暖爐嘅位就會係上座。
二、食拉麵嗰陣會遇到嘅一排Bar台。其實亦都係一樣，距離門口最遠係上座，所以記得俾前輩或者客人行先、坐入面嘅位！但同樣係一排Bar台嘅壽司店就唔係用呢招，食壽司嗰陣，睇到壽司師傅握壽司嘅位，先至叫做靚位，所以正中間先係上座，距離壽司師傅越遠又越近門口嘅，就係下座喇！
日本人嘅上下座概念，可以話係成為社會人後最基本要識嘅禮儀，當然同我地遊客好似唔太關事，但係如果你有機會同日本人食飯嘅話，咁你就盡量唔好自己一支箭坐低，等佢哋幫你安排。因為可能佢地當你係貴賓，已經安排好座位俾你都未定呢?
#JARvelogue
#上下座仲有大把嘢講下回再續
#鍾意睇嘅就Like同Share多啲啦
#俾啲動力寫落去
Search